book

பிரம்மதேவரால் சிருஷ்டிக்கப்பட்ட நைமிசாரண்யத்தபோவனம் அருந்தவம் புரியும் ஞானியர்கள் தவமியற்றும் அறச் சாலை! வேள்விப்புகையும் வேதகோஷமும் இணைந்து காணும் சுந்தரபூமி! அல்லும் பகலும் பதினெண் புராணங்கள் இடையறாது ஒலித்துக் கொண்டிருக்கும் புண்ணிய க்ஷேத்திரம்! கங்கை நதியானவள், பகீரதனுக்காகப் பொங்கி பிரவாஹம் எடுத்து வந்த புனித தீர்த்த தலம்! விரிசடை அண்ணலான ஈசனின் திரிசடையில் அலங்கரிக்கும் வண்ண மலர்களைத் தாங்கி வரும் கங்கையின் மகிமையால் நைமிசாரண்ய வனம் நறுமணமும் தூய்மையும் பெற்று எந்நேரமும் திருக்கயிலைத் திருமாமாலை நந்தவனம் போல் காணப்படும்.