book

மகாகவி பாரதி ஓர் சகாப்தம். அந்த யுகபுருஷனின் படைப்புகளனைத்தைப் பற்றியும் அறிந்து கொள்ள ஓர் வாய்ப்பாக திருவையாறு பாரதி இயக்கத்தின் இலக்கிய அங்கமான பாரதி இலக்கியப் பயிலகம் 16-1-2002 பொங்கல் தினத்தில் தமிழறிஞர் ஒளவை நடராஜன் அவர்களால் தொடங்கி வைக்கப்பட்டது. பாரதி இயக்கத்தின் இந்தப் புதிய அமைப்பினை வழிநடத்திச் செல்ல என்னைப் பணித்தனர். இவ்வமைப்பின் சார்பாக ஒவ்வோராண்டும் மாணவ மாணவியருக்குக் கோடைக்காலப் பயிற்சி முகாமொன்றினை நடத்தி வருகிறோம். அதுதவிர இளையோருக்கான கலைவிழா, இலக்கிய விழா, போட்டிகள் நடத்திப் பரிசுகள் தருகிறோம். முக்கியமான பணியாக பாரதியின் இலக்கியங்களை மாதந்தோறும் பாடங்களாக்கி பொதுமக்கள் படித்துப் பயன்பெறும் வகையில் இலவசமாக அஞ்சல் வழிக் கல்வித் திட்டத்தை நடத்தி வருகிறோம்.