ஆகிருதி

இந்தச் சிறுகதைத் தொகுப்பில், கதை சொல்லி முக்கிய கதாபாத்திரத்தின் தோளில் கைபோட்டபடி நம்மையும் அழைத்துக்கொண்டு கதைக்குள் பயணிப்பது போன்ற நெருக்கமான உணர்வு ஏற்படுகிறது. கதை சொல்லி, வெளியில் நின்று கதையைச் சொல்பவராக இல்லாமல், நம்முடன் பயணிக்கும் ஒரு வழிகாட்டியாக மாறுகிறார்.

ஓவியத்தில் அழுத்தமாகத் தீட்டப்படும் வண்ணங்களைப் போல, வாழ்க்கையின் நுண்ணிய தருணங்களையும் உணர்வுகளையும் அழுத்தமாகவும் விரிவாகவும் படம் பிடித்துக் காட்டும் வடிவமைப்பு இந்தத் தொகுப்பின் தனிச்சிறப்பு.

ஒவ்வொரு கதையும் தொடங்கிய இடத்திலிருந்து இயல்பான பரிணாம வளர்ச்சி பெற்று, அதன் முடிவை நோக்கி நகர்கிறது. கதாபாத்திரங்களும் ஏற்கெனவே முடிவு செய்யப்பட்ட ‘ரெடிமேட்’ உருவங்களாக இல்லாமல், செயலூக்கமிக்க மனிதர்களாகக் கதைக்குள் உலவுகிறார்கள். அவர்கள் வாழ்க்கையை எதிர்கொள்கிறார்கள்; சூழ்நிலைகளுக்கேற்ப முடிவுகளை எடுக்கிறார்கள். அந்த முடிவுகள் வாசகர்களுக்குப் புனைவாகத் தெரியாமல், வாழ்க்கையில் நாம் சந்திக்கும் மனிதர்களின் இயல்பான முடிவுகளாகவே தோன்றுகின்றன. அதனால் அவர்களின் மீது கருணையும் அன்பும் ஆதரவும் இயல்பாகவே பெருகுகிறது.

ஆரவாரமோ, உரத்த குரலோ இல்லாமல், வாழ்க்கையை அது நிகழும் இயல்போடு பிரதிபலிப்பது போன்ற பாவனையுடன் கதைகள் நகர்கின்றன. எதையும் வலிந்து சொல்லாமல், வாசகர்களுக்கான இடத்தையும் கதைகள் விட்டுச் செல்கின்றன.

ஒவ்வொரு கதையிலும் ஏதோ ஒரு குறியீடு, படிமம் அல்லது சொல்லப்படாமல் விடப்பட்ட ஓர் உணர்வு வாசிப்பைத் தொடரச் செய்கிறது. கதையின் முழுமையை எழுத்தாளர் மட்டும் தீர்மானிப்பதில்லை; வாசகரும் தன் அனுபவங்களோடும் கற்பனையோடும் இணைந்து அதை முழுமையாக்க முடிகிறது. இதுவே இந்தத் தொகுப்பை பன்முக வாசிப்புக்கான படைப்பாக மாற்றுகிறது.

குறிப்பாக, பெரும்பாலான கதைகள் கொங்கு வட்டார வழக்கில் அமைந்திருப்பது இந்தத் தொகுப்புக்கு தனித்த அடையாளத்தைத் தருகிறது. அந்த வட்டார மொழியின் இயல்பும் மணமும் கதாபாத்திரங்களின் வாழ்வோடு கலந்துவிடுவதால், கதைகளின் உணர்வும் நெருக்கமும் மேலும் ஆழமடைகிறது.

எட்டு கதைகளில் ஏழு கதைகள் பெண்களின் வாழ்வையும், அவர்களின் அனுபவங்களையும், உணர்வுகளையும் மையமாகக் கொண்டவை. பெண்ணின் வாழ்க்கையை ஒரே கோணத்தில் பார்க்காமல், அவளது உலகத்தை அதன் பல்வேறு பரிமாணங்களோடு அணுகும் கதைகளாக இவை விரிகின்றன.

வாழ்க்கையைப் பெரிய வார்த்தைகளால் விளக்காமல், அதன் சிறிய அசைவுகளுக்குள் இருக்கும் பெரிய அர்த்தங்களைத் தேடும் இந்தச் சிறுகதைத் தொகுப்பு, வாசித்து முடித்த பின்னரும் கதைகளையும் கதாபாத்திரங்களையும் நமக்குள் தொடர்ந்து வாழச் செய்கிறது.

வாசிப்பவருக்குள் ஒரு கதையைத் தொடங்கி வைக்கும் சிறுகதைகள்.