வெற்றி தரும் உரையாடல் கலை

பறவைகளுக்கும் மிருகங்களுக்கும் பேசும் இயல்பு அமைந்திருந்தால் மனிதர்களைவிடவும் நல்ல தன்மையாகப் பேசியிருக்கலாம் என்று நினைக்கத் தோன்றுகிறது. ஏனென்றால் மனிதன் ஒவ்வொரு நாளும் முக்கால் பகுதியைப் பிறர் குறை பேசுவதிலேயே செலவிடுகிறான் அல்லது காதுக்களுக்குள் வானொலிக் கருவிமுனைகளைச் செருகிக்கொண்டு யாருடனும் பேசிக்கொள்ளாமல் போய்க்கொண்டிருக்கிறான். ஒருவருடன் ஒருவர் பேசிக்கொள்ளும் அணுகுமுறை குறைந்துகொண்டே போகிறது. வீடுகளில் தொலைக்காட்சிப் பெட்டிகள் பலரைப் பேசவிடாமல் வாயைப் பூட்டிவிட்டன. இதயம் திறந்து ஒருவருக்கொருவர் கருத்துப் பரிமாற்றம் செய்துகொள்ளாமல் எந்திரத்தனமாக வாழ்ந்து கொண்டிருக்கிறார்கள். ஒருவருடன் ஒருவர் சற்று நேரம் மனம் திறந்து பேசலாம் என்று நினைத்தால் அந்த நேரத்தில் செல்போன் அழைப்புகள் அடிக்கடி வந்து பேச்சைத் தொடரவிடாமல் துண்டிக்கின்றன.