book

வெண்பாக்கம் சுமாரான கிராமம் என்றுதான் சொல்ல வேண்டும். அவ்வூரார் பெரும்பாலும் நாய்க மக்களே. கிழக்கு மேற்காகச் செல்லும் ஒரே தெரு.  இரு பாரிசமும் நெருங்கினாற் போல் மண் குடில்கள். நடுநடுவே இரண்டொரு காலி மனைகள். தெருக் கோடியில் மிராசுதார் வந்து தங்கும் விடுதி. அது ஒன்று தான் கல் கட்டடம் அவர் பட்டணத்து ஆசாமி. அறுவடை காலத்தில் அவராவது, அவருடைய ஏஜெண்டாவது ஊருக்கு வருவார். நெல்லை விற்றுப் பணமாக்கிக் கொண்டு போய் விடுவார். ஊர்ச் சச்சரவுகளை காதிலேயே போட்டுக் கொள்ள மாட்டார்.