book

இந்நூலில் அடங்கும் பாடல்கள் 1932-45 ஆண்டுகளுக்கு இடைப்பட்ட காலத்தில் புனைப்பட்டவை. இவை தவிர பிற பாடல்களும் நூல் வடிவம் காணக் காத்திருக்கின்றன. ஜீவா அவர்களின் கடுமையான பொதுத் தொண்டின் காரணமாக இப்பாடல்களைத் தேடித் திரட்டிச் சரிபார்த்துத் தொகுக்கப் போதிய நேரம் கிடைக்காமையால் இந்நூல் வெளிவருவதில் காலதாமதமாகவிட்டது. இப்பாடல்களைத் திரட்டித் தொகுப்பதில் ஜீவா அவர்களின் பங்கு மிகப்பெரியது; வேறு பல அன்பர்களும் உதவியளித்திருக்கின்றார்கள். இவர்கள் அனைவருக்கும் எமது மனமார்ந்த நன்றி இந்நூலுக்கு அணிந்துரையொன்று வழங்குமாறு நமது நெருங்கிய நண்பரு அறிஞருமான உயர்திரு. வெ.சாமிநாதசர்மா அவர்களை அணுகி வேண்டிக்கொண்டோம். நண்பர் அவர்களின் உடல்நலக் குறையும். பன்முக வேலைச்சுமையும் தமிழகம் அறிந்த சேதியல்லவா? இந்நிலையில் அவர் எழுதித்தர ஒப்புக்கொள்வது அரிது; அப்படி ஒப்புக்கொண்டாலும் தாமதமாகத்தான் கிடைக்கும் என்று நினைத்தோம். எனினும், நண்பர் அவர்கள் பல்லாண்டுகளாக இடையறாது புரிந்துவரும் தியாகத் தொண்டுக்கு மற்றொரு சான்றாக - தமது சான்று தேவையில்லை; எடுத்துக்காட்டாக என்று சொல்வதே சரி - ஒரே நாளில் கருத்தாழமிக்க அணிந்துரையொன்று வழங்கி எம்மை வியப்பில் ஆழ்த்திவிட்டார். அவர்களுக்கு எமது நன்றியுணர்ச்சியைத் தெரிவிக்க வார்த்தைகள் போதா.